2012年12月19日 星期三

2012 年我的十大回顧

001 -
做左十個月, 由H記轉去T記 - 本身真係無唸住無啦啦做左一陣就轉工, 因為其實老闆對我好好, 只係感覺太多小人巴巴閉閉指指點點, 我好憎唔係我既直屬上司響度多多意見, 點我做呢樣做果樣.
轉左工之後, 老實講我認為學到既野真係多左, 以前係Luck 居多, 宜家係skill多左好多.
如果比我再揀的話, 我可能留低響舊公司, 因為感覺比較Free, 比較隨心所欲, pressure無咁大;
而且係老屎忽, 可以扮撚哂野.
咁不過又咁講, 無轉工又點會突然人工加左咁撚多呢?
H記連Probation前個價都比唔到, 更加咪講係宜家個價啦.
魚唔過糖真係未必肥嚕~

002 -
水洗iPhone 4
應該係我失魂既經典Number 1, 話說係一月定二月既某個早上,
因為趕住沖涼, 之後洗衫, 心急掉哂衫去洗.....
唸住搵電話時, 心寒.....唸起手機應該是在褲袋裡.....
在洗衣機內浸了20分鐘, 當然係救唔番啦 =.=

003 -
第一部全新車
入左T記當然有新既公司車, 而且係全新, 人生第一次呀
第一部係GHJ729深灰色RAV4, 7月尾攞車, 9月頭換車, 好似總共比我行左3,000km
第二部係GMC141銀色RAV4, 9月頭攞車, 10月中換車, 好似只行1,500km
第三部係GMT174白色Levin SX, 10月中拿車, 楂左2個月, 3,300km
唔知會否係最後一部呢?
楂慣左新車.....我真係楂唔番舊款車....
無Curtain airbags, 無traction control;
無USB無Cruise control.....我點生存呀.....?


004 -
屋企黎玩
我屋企人過黎真係極少有, 特別係我老豆咁麻煩既人, 嫌塔飛機會太累, 今年都會黎玩.
於是我都拿左一個月假, 陪屋企人玩下, 睇下野咁, 順便比自己休息的機會.
但我老豆都唔係咁容易服侍, 有時仲累過番工
去左South island, 一家人去旅行未必係在於有幾刺激, 有幾好玩,
係志在一家人齊齊整整去搵個地方去咁.

005 -
搬屋
為左慶祝自己工作換了環境, 覺得自己affordability 好左, 終於搬離左個鬼地方,
呢個鬼地方住左2年, 濕, 細, 多蟲, 嘈, 唯一好處係平, 同埋近motorway, otherwise真係一無是處.
搬到黎呢度好好, 因為空間夠大, 560尺, 2/3個人住真係夠哂,
而且環境幾好, 多storage放垃圾野, 宜家間房都無以前咁多雜物.
住都住得開心好多, 個人無咁壓抑.
當然, 下個居住目標會是自己的房子啦!

2012年11月15日 星期四

去年今日


去年今日
剛剛在舊公司上班了一星期, 悶, 因為咩都唔識, 咩都無咩人教你.
但係都幾開心, 因為被我老闆響 "街上面執我番黎", 人工福利比之前份 "柒野" 好唔知幾多倍.
It was the bset of times? or was it the worst of times?

2012年11月3日 星期六

我有我講

音樂本身是好主觀的野, 你有你的討厭, 我也有我的喜愛.

張繼聰, 王菀之 - 生命之花(合唱版)
我有我講: 本身聽過這首"生命之花"的獨唱版, 不錯, 起碼令我無咁討厭張繼聰. 加埋王菀之本身好柔的聲音, 聲線好夾好優(淒)美. 有時我都幾鐘意聽王菀之Pop一點的作品, 希望佢可以再入屋少少啦.




容祖兒-加大力度
我有我講: 903日播夜播, 唔係好明點解咁值得.....佢個國語腔, 顧到咬字時就顧唔到感情, 加埋份詞.....成首歌除了個MV和個編曲值得讚之外, 其他都可以忽略.....
容祖兒真係好努力, 好努力去求變, 而且每年都出隻國語碟強攻中國大陸市場, 但多年來都無功而回, 不如停一停, 慢慢再摸索下先啦.


 小肥徐智勇 - 一首歌

我有我講: 久遺的小肥, 新歌"一首歌", 三個字 "幾好聽".
如硬要挑剔我會說Chorus好長, repeat又repeat...MV拍得簡單已很Ok但太七情上面??



賤物鬥窮人

近年埠仔窮西國家紐西爛經濟不好,
基本上所有行業都叫苦連天.
唔係講笑, 你睇睇Newmarket (類似澳門南灣吧?) 一帶office林立而且多商舖 - 理應很旺,
但主街上的餐飲一年之間的Turnover有幾快, 才發現生意真係唔好做.

在這綿羊國"縱橫"十年 - 加上我對數字這樣敏感,
近一兩年折扣, 優惠真係特別多.
基本上每個行業都要推出優惠 - 你才發現經濟有幾差
團購生意越做越有 - 連驗車, 整車, 食肆, 酒店, 基本上咩都有
唔理你原價有無人買, "折扣" 感覺就是抵買左好多!
(當然好多賤商舖借團購呃錢, 我都奶唔少野)

我記得剛到貴境時, 94年8月 -
麥記細薯條$1, 細可樂 $1, 無鉛汽油一公升 $0.90

06年再回來, 當時經濟也不賴, 通漲連年 -
細薯條$1.7, 細可樂 $2, 汽油$1.68一公升
06年到10年, 麥記都真係好鮮有推出咩價錢上的優惠

又來到今年, 麥記除左要推出個"Loose Change Menu" 專攻一毫斗零之外,
又推出咩$3 Big Mac, $5 Lunch deals, discounted lunch deals -
總之減價幅度係前所未有
12年, 細薯條又時光倒流回到18年前的$1, 汽油都已經升到$2.1啦!

銷售稅由94年的10% 加到現時的15%...
就算未計通漲, 94年賣的$1, 今天應該賣$1.05才對.....



就連叫雞都出左好多優惠
以前去KFC 叫雞, 根本都無咩特價優惠...
今年勁賣午餐Special - 五蚊雞!!A: 三粒雞翼
B: 一粒雞件一粒包
C: 雞卷
D: 兩粒雞件
E: 大雞包
以上其中一個加以下其中兩個
A: 薯條
B: 汽水
C: 薯容
D: 沙拉
你話死唔死....

仲有Wendy's...五蚊有包有薯條有雪膠有野飲,
burger king又係差唔多既優惠....

以上都只係各大快餐店推出既優惠, 冰山一角
而又真係好多好多行業今時今日都為左果少少濕濕碑既一毫斗零在拼......

都話左生意差, 真係全國性, 下至一個幾毫, 上至三四五萬, 大家都在suffering.....

同樣一部車計 -
Corolla GX 4AT 2007 - $31,650
當時連VSC, Knee Airbag, Bluetooth都未有.
戈陣紐幣一蚊對85 Yen 喎! 銷售稅只係 12.5% 咋喎!

Corolla GX CVT 2012 - $34,990
今日一蚊紐西幣對65 Yen, 而且GST已經是 15%!

基本就算未計通漲只計表面, 部車就賣得平過以前.....
如果來貨價是一樣( 31,650 / 1.125 * 85 = 2,390,000Yen)的話
今時今日部車應該賣緊 $42,280

就算係大咬如本田 -
Civic 1.8S 2007 - $29,500
Civic 1.8S 2012 - $34,900
計番匯率稅率部車今時今日都應該賣$39,450而非現在的$34,900

還有PS3破底價連三百幾蚊都賣得出,
單反鏡頭三四百蚊有交易
根本呢幾年加價, 好多野都無加足 -
Profit margin 比以前少, 但係市場根本係Slow....
無人願意去買野 - 我亦都收縮左我買野情緒
(Well, 當然啦, 呢邊根本無野買!)
雖然收入多左,
但反而五年前我食個M記七蚊餐我都覺得平過現在食個五蚊餐
當然可能係我宜家自己做野自己養活自己, 每一蚊都要好好想過度過.
亦都可能我同大眾一樣, 覺得future有點gloomy, 都唔敢亂花錢....

近兩年唯一可以一直加價一直升溫既,
我只係想到被大陸人炒到天價的房地產......



2012年10月23日 星期二

為執著乾杯

總會有些事情我們是很執著的,
但旁人很多時候都不會明白我們為何會執著這個.
或者我們自己也都不明白, 為何要一定為這小小的事而執著.....

前幾天, 有個客人來找我.
她離開了紐西蘭四年, 剛從英國回來.
想買一台車代步, 一定要手波.
我說, 可以, 但不好意思, 沒有車可以讓你試.
因為, 就算是Yaris 這樣小的車都已經沒有幾個人對手波版有興趣,
進一台Demonstrator也是光放著.

2012年的今天, 眾所周知, 歐洲以外國家, 基本上所有人買新車都已經只會買自動波.
很多型號, 2,000CC或以上 (Accord, Camry 之類的) 都已經沒有手波可供應.
就算只是小車如Yaris, Jazz, Corolla, Civic
現在一般都只會在眾多spec level (而且多是入門型號) 其中一個型號有手波.



我問她要不要試一試1,300cc的自動波才決定? 因為引擎空間也一樣.
她說不要, 完全永遠不會試開自動波的車.
我說, 兩萬多元買一台新車, 你真的不用試嗎?
至少也要試試引擎refine與否? 也要試試上斜是否夠力?
她說, 不需要了, 現在我在開一台租車公司的舊款的Yaris, 她覺得新款的Yaris只會更好.
於是我也有點無言了, 也不是經常見這樣執著的人.
我就跟她講解Yaris 的設備 - 有USB插口, 可以把CD都扔掉....
她說, 我還是喜歡用CD.....(@@).........

其實我們也不明白為何有些人會這麼執著.
但是想想, 其實有時候洽當的執著, 堅持, 是必需的.....

為執著乾杯 :P
為執著乾杯 藍奕邦


2012年10月2日 星期二

到底要多少才算是足夠?

很簡單的問題 - 到底要多少我們才會覺得是足夠?
你們可以解答我這個問題嗎?

我想永遠我們都只會在追逐, 尋求更高, 欲望根本永遠沒有休止 -
同一個問題, 在不同時間問我, 你應會得到不同的答案:
現在你最想得到的是什麼?
2002年7月 -
我希望可以由Form 2 升到Form 3, 仲有我想要PS2.....

2005年1月 - 我希望我可以幫人補習, 自己可以儲錢, 可以買好多Tomy車仔同埋同人出去飲野啦.....仲有我想********呀~
2007年7月 - 我希望可以找到一份Part time job呀, 因為我想自己儲錢買車.....
2010年1月 - 我希望可以轉工作呀, 因為宜家份工(Part time @ Starbucks)做到好悶, 又無晉升機會, 我想搵份工可以幫助到我第日大學畢業搵工架, 同埋我想快啲畢業搵錢, 唔洗靠屋企人呀, 仲有! 好悶呀, 好想搵個人拍下拖呀.....
2012年7月 - 我希望我轉工可以成功呀, 因為我想儲錢買屋, 有自己既竇口.....

但當我每得到一樣野既時候, 得到既感覺係好好, 但好多野, 特別係物質上, 得到後, 咪又係不外如是?
PS2, 玩左一排, 咪又係掉埋一邊, 有PS3, 後來咪又係玩一排?
拍拖係好開心, 但過左一排咪又係吵吵鬧鬧?
有自己車又點? 楂左一排見到新款咪又係想換?

於是, 我們不停在追求更高, 更多, 更新
其實我們到底需要的是什麼呢?

我們永遠只要求更好, 更創新
於是, 所有功能, Innovation; 根本不用一次比哂你 -
iPhone 5 的Panorama View camera 好新咩? 05年Sony Ericsson K700i 都有啦!
個茫大左又清左, 好正呀! 但你地唔係幾年前先話個茫好大好夠用架咩?
快左好多喎.....但...一年前你地又話4s好夠快既?
於是, 我們只會盲目的要求更好, 永遠唔會休止......
這方面, 我覺得Apple 新教主添曲實在是深明此道 -
人類永遠不會滿足, 比再多你都永遠係唔夠, 何不慢慢一樣一樣咁比你?
反正只要係Apple產品班友仔就會自動獻鈔,

但係, 又真係好多人排住隊買, 好正呀, 好輕呀, 好彩呀(個茫).....
但係又幾多人真係嫌本身個電話重, 嫌個芒唔夠彩, 先?
對我黎講, Viber, Whatsapp, 打電話, 飛是卜, 對我黎講咪又係一樣咁用?

當然我知唔去Innovate去Improve就無進步
但我意思係, 好多野唔係真係必要囉.
如舊年先買左4s的話, 有必要咁快買5嗎?
咁....這個up to you 啦.....

講番我自己既親身經歷 -

以前(05/06年) Form 5 幫人補習,
(果時唸住反正之後果年都走, 唔讀慈幼啦, hea盡佢啦, 自己書都唔溫啦! 出去搵錢好過! )
當時同馬嬲仔幫兩個0靚仔補習, 唔記得左有幾錢了, 無一千都有幾百 -
補左一兩個月, 去左幫個我個妹咁大既妹妹仔補,
千三蚊補到有千五蚊.
當時係好多錢架啦, 你要記得當年去買個肥仔記先六七八蚊,
去對面買三四蚊麵加兩蚊豬皮加兩蚊魚蛋已經夠食 - M記餐都係廿蚊有找之嘛
夠我買船飛去香港搵下朋友, 買下衫, 行下街, 已經足夠.
交通有屋企人接送, 又或者塔巴士, 屋企又唔洗比租, 晚飯又唔洗比錢......

07年底番澳門搵暑期工, 咁岩識人介紹比我,
三十五蚊一個鐘, 一個月都有六千幾蚊, 番左差不多三個月,
有萬幾蚊, 都已經好多架啦, 夠我去左幾次香港呀, 出去飲飲食食, 唱k飲酒,
屋企又無咩要求我比幾多屋企, 當時年少無知, 根本無咩需要牽掛, 今朝有酒今朝醉, 不亦樂乎!

08年番黎, 機緣巧合之下, 找到在星巴巴的工作.
唸住可以搵錢自己玩, 年底番去玩又唔洗攤大手版
當年最低工資是$12, 我開頭係 $12.31, 之後係 $13.69, 之後加到 $14.31 .....
當時好開心架, 有得食有得拎, 一個星期勤力少少番 30個鐘扣埋稅到手有三百幾蚊,
大把錢剩, 只要唔係太誇張地貴, 我想去唱k就唱k, 食飯就食飯, 買iPhone就買iPhone,
根本無咩所謂~_~
雖然番工係遠, 單程都要行半個鐘先番到工, 但係當時我都好開心, 因為可以靠自己既努力儲錢.
就係因為呢份工我買左我自己人生第一部車,
後來我再回想, 我已經不明白當時為何日日走路走到半死,
今天我根本不會行多於十分鐘的路, 停車場要最近的停車位才泊, 寧願等耐少少!
因為我們得到好的, 便不會想走回頭路 - 有車, 便不會再想走路.
但做耐左, 我唔滿足, 我認為我應該得到更好,
我唸, $14.31 一年做足五十二個星期一星期番五日咁辛苦都係得$30,000
聽講大學畢業做銀行係三萬五到三萬八喎.....
於是, 三萬蚊已經取悅唔到我,

因為我想要更多既野, 我想畢業後賺得比 $14.31多.
因為以前的多, 是今日的少. 昨天的少, 在明天是更少, 永遠唔會有休止.

又到10年8月的某一日, 我一怒之下無做Starbucks,
後來只在食穀種食左一排,
10年尾summer打算留響度, 決定搵工做,
但一直都搵唔到, 可能好多工都已經比暑期工既人snapped up -
於是, 靠朋友搵左份收銀, 人工係$13 一個鐘,
只番星期六日, 埋單都有百幾蚊, 叫做夠交租呀....
無咩錢既時候簡直係一個清泉....潤澤著我窮困的日子.......
但慢慢又覺得唔夠, 因為又係想搵更好,
又有其中一個原因, 就係我覺得好悶, 日日入袋收錢, 好撚悶.....
於是我滿足了一時銀包的乾涸之後, 我又再次唔滿足, 因為我覺得我自己deserve更多.......
所以, 又無做啦.....

之後有一排Focus on final semester in uni,
差唔多做完之際, 又周圍搵工,
唔知係我唔好彩, 定係我相關經驗唔夠, 定係我份CV唔好睇, 定係真係經濟咁差,
Send左好多份CV, 唔係無回音, 就係有更好人選.
果一刻明知自己已經快畢業, 好難再靠屋企人比錢供養我在這邊漫無止境的等待工作機會,


心開始急, 所以亂西咁搵, 咁岩又係有朋友介紹,
入左一間電話公司的分銷商度做,
呢間野既特點係, 中國人做老闆 -
要"實習"一兩個月, 睇下係唔係岩用既人, ETCETC.
總之, 一句講哂, 底薪係零蚊 -
但當時基於我係在垂死邊緣 - 一於"括"出去, 無底薪齋靠commission 都殺啦.
因為人在這時候, 都已經無得輸, nothing to lose.....
每天付出少少時間, 咪當做試下.....
打左一兩個星期, 佢覺得我ok, 可以試下做sales -
於是我都好賣左咁做, 因為會有commission分呀.....
一百蚊同埋零蚊, 當時對我黎講係好大分別呀.......

就係因為呢份工, 我就搵到我之後的工作啦 -
我唸番起, 番左電話公司的三個月,
8 月分了 $42.4
9 月分了 $473.91
10月分了 $293.42
加埋係幾多呢? $809.73
一星期番三十個鐘, 番左十三個星期.......
扣埋自己出車出油費, 擺明係蝕本生意帶錢打工.
但我又好慶幸呢份工帶到比我另一個機會.....

有一天我的一個客人因為我多口問的一句, 問我有無性趣去佢地度番工.
package係咁 $18,000 + commission + 車 + 油
由零蚊變成萬幾蚊, 由自己比油錢變成公司比, 由舊車換新車,
當時我唸都唔洗唸, 當然係lur飯應啦 !!
做了幾個月, 感覺上好快上軌道, 而且好快有人工加, 我認為是我運氣好吧.....
計番條數其實已經超額完成, 一個岩岩大學畢業0既0靚仔,
做左幾個月人工比我當初想做銀行剛入職還要好,
我是開心的, 因為由零開始, 行到呢一個位置, 已經係好大步......

雖然人工是不錯, 我又不是很會花錢的人, 是可以過著不錯的生活,
但慢慢, 漸漸....又是覺得不足.....因為見到別的地方人工更高喎.....
the grass is always greener on the other side
上網見到呢份工package好啲喎, 機會又好似好好多喎.....
於是, 又膽粗粗去見工, 咁好彩佢又請左我.....
人工係加左好多, 但係要承受的壓力當然更多啦....
試想如果一萬蚊同四萬蚊人工做既野如果係一樣, 咁點解唔請四個一萬蚊既人呢?
但係當然想試下做人工更高既地方啦......

於是, 我們便在無止境的追求更好, 更多, 更多, 更多.......
萬一我呢一份工我真係搵到$70,000, 好快, 我又唔會滿足於呢七萬蚊.....
我又會去尋求更多......

就算你問長x和x主席, 佢幾千億身家, 點解都仲要起埋哂啲咁既樓?
因為more is still never enough.....

以前我們只要求有部手提電話, 後來我們要鈴聲可以自己入歌, 我地又要電話響時有七色在閃, 我地又要有彩茫, 又要有影相功能, 又要有上網, 又要有飛卜, 又要有GPS又要有個Siri陪我地傾計.....
要求總會是越來越多, 因為我們已不會滿足於現有的東西了......



咁到底, 足夠的定義是什麼? 是否有一個新benchmark 舊的"足夠"已經不成立?
哪一天, 我們才會覺得足夠是足夠而不會再ask for more?



2012年9月28日 星期五

那邊見



今年好多人Come and go.
5月認識的一班朋友
6月一個不太熟的朋友
6月好朋友的女朋友
7月我的屋企人
7月一個好爛賭的朋友
10月頭有一個識左四年既朋友走
10月又有一個朋友黎玩...

不停循環而又復再
平時或者唔會珍惜同佢地一分一秒既時間
但係一想到要分離離別既時候先會體會到傷感
但人大左, 其實都發現離別不是什麼大的一件事
當然偶爾空檔會想起, 但大家都已有自己生活,
亦都習慣左自己的生活, 知道大家平安, 生活得開開心心便可以.
見面? 其實現今的科技已真的很發達, 有心的可以好好保持聯繫.
面對面見面, 當然是好, 但科技已幫助了很多的啦.

不知12.21是否真的末日? 到呢一刻好似已經無咩人講
我們說了再見, 其實是否一定有得再見?
如果末日了, 我們便沒有機會見了?

無論如何, 早或遲, 我們都會在那邊見.

2012年9月26日 星期三

數字人生

無聊文章一則 -


好多時候我地都會用數字去鑑定, 去決定一樣野是否好, 或者用數字去比較.
貌似簡單, 直接, 因為數字係最容易黎做比對.
但其實又是否因為我地對呢樣野認識不足,
而又無其他非數字既方法去比較, 所以我地會用"貌似合理"的數字去決定高低呢?

以下請揀一個
A. 32A
B. 34C
C. 35G
感覺是35G最好.....因為最大, 最突.....
但如果係巴士路線呢? 揀左35G未必去到你目的地喎.............


比如說 -
我會上網睇流行榜聽歌, 以前細個會好留意第幾位第幾位.
其實又代表咩呢?
今個星期容祖兒首心花怒放播左40次升左五個位排第一,
張敬軒首披星戴月跌左兩位變第三.
係唔係上星期首歌好聽啲, 今個星期無咁好聽, 因為容祖兒首歌今個星期好聽左?
叱吒頒獎攞至尊歌係因為好聽過第十位果個十倍?
當然係好極端的例子, 但我講出既係,
數字雖然可以給我們一個Idea, 但很多時要用數字去理解去比較, 更因為我地唔了解成件事.

又比如 -
以前我番工既地方, 每一個Branch 每個月有一個Outgoing calls的Target,
作為Manager們的入息標準, 如果超左Target manager就有更多Commission, 如果低於就扣咁啲.
就因為Manager係受Outphone 影響收入, 咁我地做細既, 打得多電話, 人工都有加.
其實打Outphone的目的又係咩呢? 山高皇帝遠, Head Office 萬仗遠 -
想要評定間Branch有無努力,
只可以從"跟Customer的主動Contact" 去鑑定間Branch是有做野定係無做野.
我地做細既當然鐘意吹大個數字, 因為越打得多我越收得多嘛;
我老闆當然鐘意我吹大個數字, 因為我越吹得大佢都越收得多架.
Head Office 當然都鐘意呀, 因為睇見我地個數字咁好, 比Target都仲超出20%,
就會覺得 "個Team 好努力呀 <3 " 至於點解銷量都係咁差呢?
佢地就有得賴啦 - "打電話同試車都好夠喎, 全部達哂標, 一定係個經濟差 ... "
於是, 佢地就完全唔會反醒自己marketing的問題,
於是, 市場佔有率就由06年的8.09%跌到11年的4.08%.

" 屌你, 你又話數字唔可以作準只可以做簡單參考!!? "咪撚屌住啦, 我都未講完 -
佔有率大跌, 唔代表產品出現左問題, 突然差左咁多?
絕對唔係啦, 數字可以代表更多....
Marketing問題啦, 市場認受問題啦, 售價問題啦....
佔有率多亦都當然唔代表最好啦, 但對於一間mainstream公司黎講會係囉.....

又比如 -
有三個Sell屎 -
一個賣電話既同你講佢今日賣左三部電話
一個賣車既同你講佢今日賣左兩部車
一個賣屋既同你講佢今日賣左一間屋
咁你就會覺得賣間屋戈個好似勁啲喎, 因為間屋既價值最高, 佢今日搵最多錢.
但又係唔係成個故事既全部呢?
呢個賣屋仔可能試左賣比100個人先賣得出一間.
個賣車仔試左十個客賣左比2個.
電話仔一個客幫左佢買三部.
咁又係唔係代表賣電話果個叻仔少少呢?
其實根本比唔到,
因為最唔起眼賣車果個0靚仔, 其實今個月既今日成績係最差, 平時佢日日都賣三部車.
咁又但係, 賣左好多車收入最多又係唔係代表佢最成功呢? 佢因為日日番工太勤力,
無朋友, 無女朋友, 連放假休息既時間都無 - 咁又是否最好呢?


所以我覺得,
好多野係因為用唔到非數據既野去評測, 所以我地用"理性, 數據, 科學"去支持
如果我問你 - 你覺得我好唔好人?
你唔識答, 因為你會唸 - "條友成日講粗口, 楂車燥狂, 把口好賤, 以為自己好醒 ...."
但又唸唸下, "其實佢都幫過我xxx, 同埋佢又幾靚仔, 英俊.....仲有少少似陸永添"
然後你可能會唸, 講粗口, 扣十分, 把口賤, 扣廿分.....似陸永咁靚仔, 加佢30分.
最後你都可能覺得我係值60分, 總算是個好人.
但好多野, 用數據用科學根本就唔會幫助到,
你覺得我靚仔, 咁咪足夠囉!


其實我都唔撚係好清楚自己講緊乜 -
主要係想帶出下現今我地好多時依靠哂數據,
但個數據對自己有幾relavant都唔知
你明我講咩就留個言啦!


2012年9月15日 星期六

命運的安排 (二之一)

之前有提過, 轉到新工作,
雖然都係做番呢一個行業, 但係唔同品牌,
照顧既市場唔同, 公司規模唔同, 做事方式唔同.
像我這一種有少少經驗反而麻煩, 因為真係需要時間適應.
白紙一張, 當然容易由0開始.

人最脆弱既時候, 很容易就會想到"放棄"兩個字.

但我又明白到, 困難, 其實永遠都係有時間限制, 過左果一個時間,
望番轉頭, 無論件事如何解決左, 成功, 又或者失敗, 其實又唔係咩大問題,
反正都已經過左去啦!

命運的安排其實真係好巧妙:
2011年番到黎, 找工作, 未找到,
因為我識既朋友都同我差唔多, 介紹既工都唔好得去邊.
介紹左我入一間中國人公司, 做既係打電話, Call 客, 叫人轉手機網絡供應商.
冇底薪, 接到客分幾十蚊. 朝9:30晚5:30.....工作時間唔算長, 而且根本唔番人地都唔理你.
其實都可以啦, 當然唔會好似以前大學走堂走得咁離譜!
8月頭左右開始番, 番下休下咁, 有時又扮下病咁.
9月由打電話變左行街街的Sales.
去行街直接同人傾感覺無咁悶, 同埋我自己賺哂份commission嘛!
就算係咁, 根本都係得好少錢, 一個星期可能真係得一百幾十蚊.
即係我一星期番三十個鐘值幾錢人工? 五蚊一粒鐘呀? 真係油費都蝕埋.
連我自己呢個moment唸番, 都唔鬼明點解當時會願意做架.
但係錯有錯著喎.

有一次去行街Sell客, 咁岩比我搵到一個客(Susan),
咁岩我多口問佢一句, 佢地公司(HMC)請唔請人? 佢話暫時唔請, 但佢話會留低我電話,
到時真係有人走, 就會搵我, 當時為一年前的昨天, 2011/09/15
咁岩無幾耐, 10月4號, 佢send個message比我,
話真係請人, 但佢老闆又唔想公開招募咁慢慢煙人, 再慢慢西,
問佢有冇覺得Ok既人可以介紹, 佢唸起我呢個賣電話Plan既死0靚仔.
叫我有性趣的話就過去交低份CV.
當然有性趣啦, 簡直興奮啦, 即日Print左個CV, 飛車去間公司度交低.

10月12號星期三, 未有電話, 我自己主動打去問個老闆點解未打比我,
佢話果排好忙, 冇時間搞呢樣野, 之後個星期會得閒少少,
問我星期二得唔得閒去見, 當然得啦!
見左, 佢地好滿意, 叫我番屋企做個網上人格性格測驗.
幾日後打比我, 話我個結果好好, 決定請我.
"命運就地改寫........"
當然呢間公司唔係咩勁大公司, 但都算係國際上市公司,
差唔多個個國家都有的品牌.
個職位只係Sales, 無咩特別, 但係已經對我黎講係一個大Step Up.

First Day 就定在11月7號.............
雖然呢間公司(HMC)我唔係做左好耐, 7月中左右已經完成我的Last day.
但這次的經驗真係令我好難忘 -----
6月中, 在網上看到我宜家間新公司(TMC)請人,
要搵條粉腸識英文, 廣東話, 國語 - 等左成個月, 我一直唸緊send唔send CV好.
份工作的網上廣告有效一個月, 拖到最後一日, 我決定去馬Send CV.
我同事叫我直接去搵個老闆. 好! 我印左份CV, 直接搵個老闆.
即In我, 問我做緊咩, 點解想轉工, 問左我唔係好多問題,
打比我的Referee問我人格, 性格; 無幾耐, 決定左請我. 人工都加左好多.

命運的安排真係好奇妙, 你永遠唔知下一秒會發生咩事


機會 - 真係一個Moment 的事情.
假如 - 當初我沒有多口問句, 呢個行業又唔會take響呢方面冇經驗既人, 而個女人(Susan)又唔比我個假熱誠呃到, 我會唔會入到呢間公司呢? 之後又會唔會比我跳到黎TMC呢?
如果 - 我當初無呢個際遇, 我又會做緊咩呢?

當然, 假設問題, 我們都是沒有答案的.
但我真係非常感恩, 有個咁既機會比我.

話時話, 機會是重要, 但很多時候也要借助偶爾遇上的機會.
天時, 地利, 也要人和.
如果當天我不認識Lawrence, 他不知道我在找三個月的暑期工, 我未必會入到永利呀, 我未必會得到這樣寶貴的經驗呀.....
如果我那天沒有陪Jai Star去超市買東西, 他不會知道我在找工作, 不會叫我去超市外的Starbucks試試, 如果我沒有之前在永利的經驗, 他們可能只覺得我是一個沒工作經驗的人而不請我呀.....
如果我那天沒有括出去, 做沒有底薪的賣電話工作, 我根本不可能得到之前在HMC的工作呀.....

我相信成事當然要件人都Ok, 但也要有個connection比你先可以.....
際遇, 真係好難講, 我真係好幸運, 遇到咁多貴人!




有人會覺得我反骨, 咁快就轉工! 間公司願意由我乜春都唔識開始教我, 做左八個月就走!
有機會慢慢同大家講我轉工原因!



話說剛才我話有想過放棄, 當我唸放棄既時候,
我又反問番自己,
1. 一年前我係點開始, 慢慢一步一步走到呢一步?
2. 如果我唔做呢樣野我到底想點?
3. 如果一年前唔係行呢條路, 我宜家會係點呢?

這些問題的答案, 明天待續.
謝謝收看, 晚安!

2012年9月6日 星期四

Honda NBOX - 本田近十年的Commercial Success


NBOX 是今年在日本新登場的Kei Car
Box car 其實已不是什麼新玩意,
遠至豐田bB, 日產Cube, 本田Spike都已玩過.
NBOX在K car 堆中的玩法也不是新事,
Van 型的四座660cc車仔, 早至03年的Tanto, 08年的Palette已有玩.

新一代的本田車已經不是注重可以炸出幾多馬力, 紅轉區有幾高
而是盡量貼合真正用家需要.
他們似乎也明白這一點, 高性能VTEC的Civic, 賣得幾多部呢?
不如實實際際的做部everyday都可以開的車.
01年的Fit/Jazz 便是一個好例子.
把油缸移到前座下, 後座便可以騰出更多儲物空間.
後或腳位跟同年的Civic/ Corolla 不相伯仲.
空間彈性到今無人能及, 這個成功方程式為本田小車打開了新一頁.
02年在日本便打倒34年冠軍Corolla成為日本Top selling model
低油耗, 以最小的車身尺寸換來最大最有陣性的車箱, 成為日式小車爭相模仿對象.
期後的豐田Ractis, 日產Note, 三菱Colt都是相似的汽車, 但暫時無人能及Jazz的銷量成績.

NBOX的成功, 其實不是靠什麼新意,
660cc, box car 是史前產物.
成功大概是把Fit 的優點再發揚光大, 放到再小的kei car上.
日本產品特別精緻, 因為日本人都習慣小的東西,
以最小的空間換取最大的空間感和變化, 是日本人最令我佩服的事情!

因為kei car 尺寸有限制, 要在特定 (3.4m x 1.48m x 2m) 的尺寸內換取最大空間,
Fit 的中置油缸便能發揮最大優勢.
後座竟有56cm的Footroom, 比Fit 的28cm還要多一倍!
雙趙門設計, 在峽窄的日本停車場上落車便有更大優勢.
不難明白為何近年很多日本車都採用趙門設計 -
上至Alphard, Estima, 下至Freed, Sienta, Porte等車.


還有新加入的NBOX+, 進一步把地台降低,
33cm特低地台, 方便輪椅, 單車, 貨物進入.
對於日本老化的人口來說, 是一分方便貼心的設計.


又可以分上下屠儲物, 又可以把座椅摺起放高身又易搖擺的東西, 又可以全放平變床......

86 剛推出便成為"省招牌"之作, Fit 也證明了小車也可以有趣味不是一味的廉價. S2000也是近年經典
其實本田和豐田不是不會造好車,
只是近年很多車款,
2009年的Insight, 2012的Civic, 2013的Accord,
根本都像在交行貨一樣, 為了轉款而轉款, 沒有真正改善本身的質素,
純粹為"刺激銷量"而轉個樣, 銷量也反映了一切.

能看出這次的NBOX是本田精心設計,精心計算的Product.
銷量上已反映這一點.
今年本田Kei Car 銷量應該會不錯
NBOX已連續五個月銷量冠軍.
首八個月,
大發Mira 暫時領先, 160,290台
本田NBOX第二, 142,986台.
接著係九年冠軍Wagon R, 132,072台.
本田一直都不算是kei car的top player, 但似乎隨著一系列的N-Series 新車.
Honda kei cars 會go big ..... 在日本這樣的經濟情況下, 本田的方向絕對正確.


我是一個很奇怪的人啦.
你問我喜歡什麼車, 我是什麼車都喜歡. 你送比我的話, 咩車都無咩所謂.
但你比我揀一部車任楂, 我都未必會揀大車, 貴車.
車對我黎講係一件工具,
舒適是前提, 駕駛樂趣是其次.
日日番工都係行高速, 都係塞車, cornering幾好同我無咩關係!
公司早陣子準備登記部新RAV4讓我開, RAV4不是不好, 而是我沒有需要這樣大的車.
每天上班下班都在塞車, Corolla 反而更岩去涉位. 最後我揀左Corolla.
你要比部GT86我嗎? 幾日, Weekend出去威是可以啦.
但要我日日楂? 咪搞啦, 部車太低上落好麻煩, 盲點又大轉線好唔方便, 產上行人路又驚刮底....
好嘈呀個引擎, 後座好難上落又窄喎.....
可能我真係太實際!

你問我真正想Own咩車?
我答你會係靈活, 空間舒適, 方便接載家人的車.
01年推出Fit的時候我已很喜歡此車,
空間以小車來說是Limo 級數, 低排放, Affordable, 外型不太差.
最後我的first car 真的買了Fit.
搬野又得, 放平變床又得, 坐人又無投訴!
下一部要買的車?
都係要空間大, 低排放, 易負擔.
其實我舖左咁耐, 我想講既係,
部NBOX真係幾岩我!

當然暫時是沒有需要啦, 有公司車有公司比油錢, 自己部車又擺住響度.
不過部NBOX真係幾吸引到我, 唔知過幾年有無機會買部玩下呢?


2012年9月4日 星期二

往事

在翻看自從有了數碼相機後的自己
是從2003年中左右吧
有照片, 很容易勾起過去的回憶.
少數情況下, 看著照片也想不起當時確是在做什麼.
那沒有照片的呢? 有多少又能記起呢?

時間自二十歲後就像日月般飛逝.
每天在忙, 又或者在扮忙, 過去的記憶忘了便不會再記起.
記憶是什麼?
發夢是一個記憶,
照片是有證據的記憶,
那沒有照片的記憶, 其實也不就等如是一場夢?
有些人很執著過去, 要追根究底.
但想了一想, 真的沒有必要.
就如, 你發了一場夢也不會去找答案.
因為它也只是一個記憶罷了

2012年9月3日 星期一

新工作

生活和時間漸被工作侵食
這也確是沒辦法
說實在嘛 .. 以我的觀察,
干我們這個行業的,
實在是十分困身, 很多同行的人, 我也見是妻離子散的.
還好, 暫時未有兒女, 還可以應付.

這個留待下回再說.

近日在新工作環境下, 還是未太習慣.
打個比喻可能大家都能明白.
以前在小公司, 一人做五人的工作.
廣告, 拍照, 銷售, 保險貸款, 以及很多鎖碎事都由我來做.
就像是亞視的人拍劇, 因為公司規模小, 化妝Set頭什麼都也是由自己來做.
但一轉到大台如無線, 什麼都要有規矩, 知道做自己應做的事.
現在的我就有點像轉去大台上班一樣, 以前都是習慣了自己一腳踢,
覺得無咩問題, 現在反而每個步驟都有人把腳伸過來參與, 這樣便不習慣.
我也跟自己說, 我希望這是短暫性的不習慣, 始終新環境, 也是要時間習慣的.
只可以跟自己說, 機會的確是比以前改進不少的.

想想, 在一個擁有三十個品牌的市場.
做一間擁有18% Market Share 和 4%的分別會差幾多呢?
就如無線衰極, 老套極的電視劇收視也有  30點.
亞視嗎? 好極都只有7點左右.
而我現在做的更是New Zealand Top Selling Brand 的Top Branch.
即係有機會拍無線黃金檔期, 做個路人甲都好過去二視做視帝啦!
當然這個只係一個例子, 而現實世界中個餅整大左亦會多左人番黎搶.

只可以一直跟自己說, 別把事情想得太糟, 想得太深.
必要時, 想得淺(錢)一點 -> (玩了食字添!)

加油, 努力..............12:27, 明天還要上班呢!

2012年8月29日 星期三

第一次

已不記得對上一次係幾時打Blog.
唔打Blog 可以找到好多excuses, 番工忙, 放工累, 多野玩, 無一張正式既電腦台.
但我係一個成日唸野既人, 不停brain storming...唸呀唸, 不停唸到好多ideas.
唔寫出黎比自己日後睇番又真係幾浪費. (~_~)

話說我以前都有個Yahoo Blog - 用左岩岩好六年.
六年唔係一個短既時間, 從來無唸過放棄,
但今日覺得, 六年前後, 我已經係一個好唔同既人,
唔想活在過去, 以前寫既野太白痴啦, 日日都係打去左邊玩, 去左邊hea @@
而且個Yahoo blog 越搞越垃圾, 開出黎都唔Q 開胃.
(話時話Yahoo 都似乎越搞越唔檸掂)

Anyway, 呢排日日都在番工.
0700要起身, 刷牙, 整整個頭, 趕快食個早餐, 0745已要出門口了.
0830 一番番到 1730.
呢間公司岩岩轉去, 好多時候都響度習慣緊環境, 學下野咁,
又唔好意思比人知你無野做緊. 但我發覺扮忙反而仲辛苦.
放工1730, 基本上咩都唔做塞車番屋企已經1815.
如果要買野煮飯, 無1930 都未食得飯, 食完又要洗, 洗完又要準備定聽日.
沖埋個涼又已經2030, 要保持有8個鐘睡眠的話, 最遲2300又已經要上床.
日日追追趕趕, 埋頭埋腦, 到頭來只係換得150分鐘的自由時間.
這些時間, 又可以如何efficiently 地運用呢?
有人說不在乎長短, 只在在乎充不充實.
喂, 你睇套戲都要90分鐘啦最少!? 加埋楂車去泊車, 買飛行入去, 睇trailer,...睇完拿車番屋企
...............150分鐘無哂啦.

一個星期有可能要番哂七日, 150分鐘 x 7 = 1,050分鐘的私人時間.
好似好多咁, 但係可以做既又係咩呢? 特別係你番工已經累到發溫.

好多人同我講, 梗係唔係咁計啦.
如果一日咁計:
0000 - 0700 在睡覺 - 你在休息, 在為來日準備, 是在享受.
0700 - 0745 在刷牙, 吃早餐, 在換衣服準備上班, 也應好好享受.
0745 - 0830 在開車, 有車渣, 是一種luxury呀, 就算是塞車都應該是快樂的!
0830 - 1730 在上班, 一天有九小時在公司, 也就是over 1/3 你的24小時, 如果你在忘不enjoy的話你的人生也有成 1/3 唔開心呀!!
1730 - 0000 也在此不多說了, 暫時!

咁其實我想帶出既係咩呢?
就係呢個人講得岩, 既然番工已經是註定了的, 而且佔了生活的1/3或以上,
跟睡覺一樣重要, 咁為何要搞到佢唔開心呢?
但係..........真係好難做到喎, 當你有壓力既時候, 你又好難搵個理由去唔怕佢, 反而去愛佢, 反而去enjoy佢掛大佬!?





( ....待續)